無綫新聞近年成日俾人彈佢哋是是旦旦，堂堂大台俾人狂寸係CCTVB，唔少前線記者都承受好大壓力。唔知係咪俾人話得太多，大台新聞部可能想一洗頹風，最近竟然多次「深入虎穴」，喺多段新聞報道中加插社民連嘅回應。最經典一幕可以話係上星期六嘅六點半新聞報道，黨主席陶君行、行委黃浩銘、副主席吳文遠，個個輪流chok住亮相。
一節新聞見足三次
咁經典嘅casting，先係報道港鐵加價問題，記者講完港鐵主席錢果豐俾學生寸佢少搭地鐵，接住就去片報道社民連喺旺角港鐵站收集市民簽名反對港鐵加價，行委黃浩銘有幾秒closeup，清晰表達丐幫訴求。
之後報道中聯辦主任彭清華批評年輕示威者以自由抗爭之名妨礙他人，TVB記者相當公道，搵埋主席陶君行做回應。阿陶喺鏡頭前批評貧富懸殊、官商勾結，制度唔民主，全部出到街。同一節新聞，冇耐再報道監警會主席翟紹唐訪問，講激烈示威，社民連拉橫額示威嘅場面，再次喺TVB新聞報道出現。
「以為其他政黨唞暑」
一節新聞見足三次社民連，有網民話「唔講仲以為其他政黨提早唞暑」。曾經有一段時間，泛民面孔冇乜機會喺CCTVB出現，今次社民連做咗TVBuddy，有網民話唔知係好事定壞事。有人話社民連終於一償所願成為CCTVB新寵兒！有人話「冇人報，即係社民連已經泡沫化；有人報，又會唔會係社民連已經走入建制」？
八方問過社民連中人，佢哋好公道咁講，無綫新聞一向對佢哋唔係太差，一直有keep住搵社民連做回應。不過黨主席陶君行都話，TVB最近一個月內先後搵咗佢三次，包括撞曾事件、一哥曾偉雄話3.6清場要道歉係天方夜譚，同埋最近呢次彭清華批示威者。曝光率高，阿陶話最主要係個黨同好多issue都有關係。
mailto:[email protected]