港股上禮拜跟隨外圍反彈，恒指先後升破10日同20日線，上日報收23158，收復23000關。
恒指50日及100日線分別喺23347同23407，係短線嘅重要阻力位，如果冇好消息同大成交支持，唔容易一舉突破。花旗同日本股市又點？花旗股市上禮拜五繼續升，睇走勢道指仲會上試12400，不過呢個位阻力好大，如果受阻，亦會影響港股嘅升勢。日經指數企喺9536，有機會上試10000點關，不過一切都要睇核危機嘅發展。
中海C輪28097：中國海外（688）上日報收15.28元，升3.1%。股價已經低沉咗一段好長時間，近期受業績刺激掉頭炒上，家企喺250日線關前，睇走勢同成交嘅變化唔似係虛火，升破16.50元睇17.70元，可以諗吓隻C輪28097。
隻輪現價18.8仙，2011年12月28日到期，行使價16元，溢價17%，引伸波幅42.3%，槓桿率8.1倍（有效4.2倍），正股升上17.70元，28097睇33.5仙，正股跌穿14.50元就沽咗隻輪。
俊樺