熊黛林前晚一身低胸露背性感打扮出席寶馬六系新車於跑馬地舉行的活動，與諸葛梓岐一黑一白成為焦點。黛林指自己在香港及南京均有座駕，很享受駕車帶來的速度感覺，問她出名愛車的城城是否一部性能良好的車？她笑說：「佢係一部好勁嘅賽車，好有力量同爆發力，好快但係都好安全。」
平時有否駕駛城城的名車？熊黛林說：「太名貴啦，我唔慣揸大車，做乘客好啲。」問她與城城同車通常在做甚麼？她說：「聽音樂囉。」再問她在自己車內是否長備城城的CD，駕車時開迷你城城音樂會？她說：「唔係呀，我駕車淨係播女仔歌。」她並大讚前晚的寶馬新車漂亮，記者提議不如叫城城送給她？她續說：「努力工作賺錢喺自己能力範圍內買會舒服啲。」
超雲舊愛論緋聞
何超雲前男友王大業前晚也有出席活動，問他有否留意超雲近期的緋聞，他說：「都好難睇唔到。」那認為超雲與陳山聰合襯嗎？「唔知，寫到咁亂，再講就好似叉隻腳埋去。」會否叫超雲專一些？他說：「佢私人事我干涉唔到。」一度周旋兩男之間，會否覺得超雲被人利用？「佢淨係自己一個都好有noise，係聰明女，不過仲好細個，需要多啲人生經歷。」
諸葛梓岐延遲嫁
此外，諸葛梓岐昨日在澳門出席Clarins活動時，透露今年結不成婚，要順延做龍年新娘，她說：「原來籌備婚禮真係好大件事，自己工作排到12月，男友問我攞期我都deadair，連抽時間去紐約睇婚紗都唔得。」
採訪:梁錦雯
攝影:黃文偉