有一個好嘅保險agent幫手好重要，因為佢會同你講乜嘢叫做夠，唔係淨識游說你買新保單。前排敏妮因膝患入院做咗個小手術，動刀嘅醫生喺行內有番咁上下，所以收費唔平，敏妮除咗claim公司保險，好彩私人買咗份住院保險。
不過，公司換咗投保嘅保險公司，新公司服務認真麻麻，做嘢甩漏都唔只，仲要求好多文件證明。敏妮對保險叫做有啲認識，覺得呢間公司要求嘅文件好似同索償無關，但敏妮始終唔係保險專業，所以就打電話請自己個保險agentAnn幫手。如果敏妮公司份保險賠償越多，幫Ann買嗰份就可以claim得越少，所以在「公」佢絕對幫忙，在「私」佢亦好替敏妮緊張，所以本來等咗成個月都冇回音嘅索償，Ann一出手就喺一個星期搞掂。經佢初步計過，應該全部賠足。
買住院保險 可考慮加top-up
其實今次敏妮唔使點出錢，都係因為Ann之前提醒敏妮，揀住院保險時，唔好只係考慮揀邊個class，住大房定私家房，反而應該考慮加top-up。所謂top-up，其實係要畀多少少保費買嘅額外保障，好處係，當住院開支超出基本住院保險最高賠償額時，top-up可賠償超出費用嘅80%。
不過，Ann講，唔少「有心人」濫用top-up。好似有啲人只係做檢查，但會請醫生幫佢寫紙，講到有入院需要，咁就可以透過住院保險索償。Ann講，有啲更誇張嘅例子，投保人入院做檢查，自然要喺醫院用餐，叫醫院餐可以claim，位投保人自己食之餘，仲幫探病嘅屋企人叫埋，大家一齊食。雖然一般住院保險對醫院膳食索償每日有limit，但投保人就係睇準額外使費可以撥去top-up，所以有便宜唔好使頸。
咪睇呢個係個人操守問題，因為有啲咁嘅人，搞到保險公司收緊條款。仲有，越多人咁做，索償額就會越多，羊毛出自羊身上，咪即係逼保險公司加保費，無形中累到啲守規矩嘅投保人。
溫敏妮
http://wanmanli.com/blogs/