中視金橋（623）受惠祖國媒體廣告熱爆需求，嚟緊日子繼續肥仔水，要買。中視金橋主打祖國媒體廣告營運，兼且係央視電視廣告時間嘅最大私營銷售代理之一，有呢個牌頭，已經係優勢。而集團呢期啱公佈2010年度（12月底止）業績，純利就翻過半番到1.58億銀（人仔．下同），PE得番8字頭單位數，已經好省鏡。再講，祖國經濟keep住高增長，廣告需求亦都熱爆，好似今年央視廣告招標額，超出100億銀，再創出17年新高。
中視金橋食住超靚勢頭，繼續肥仔水。唔好估多，集團2011年度純利，係咁意增長25%到1.98億銀，預期PE跌到得番6.9倍，直情靚爆鏡。而對上星期，中視金橋經單日急升，似係打緊上升旗，趁呢轉買入，博翻半番到4.2港銀，集團預期PE，不過10倍多啲。
華基光電博升20%
華基光電（155）明日（周一）EGM，議決收購祖國太陽能光伏項目，一於實。呢期東洋國核電災變，市場追捧太陽能光伏業務相關企業，華基現價0.134元，貼近半年低位，只要EGM一通過，集團已經有point炒落後。又呢次華基收購所發行可換股票據，每股兌換價0.124元，同集團現價差無幾，唔係大茶飯套利價。有理無理，嚟轉短打，先博華基升20%到0.16元。
錢雋