外星人侵略地球電影真係拍到爛，最近有套《異形侵略戰》，但觀眾一樣受。其實打機都可以殺異形，好評嘅《末日之戰》終於發佈新一集；主角着套奈米生化裝，常人打唔死異形，上身後即刻夠抽，仲要支援3D，周柏豪都話有臨場感！
記者：王震遠
攝影：周錦文
外星人搞紐約
PCGamer一定聽過《末日之戰》，等咗4年終於有續作。今次唔再喺熱帶雨林打生打死，戰場移師至紐約。故事由科幻小說家RichardMorgan編寫，同樣係打外星人，但背景轉為2033年；話說紐約俾外星人入侵、變成廢墟，就連美軍都投晒降，又係靠主角一人拯救地球。
玩偷襲 打背脊
上代出現過嘅奈米生化裝（NANOSUIT），喺今集將會全面升呢，唔止外表型棍，功能更多元化，隱形、輕功、鐵布衫樣樣齊。
當中有唔少場口都要靠佢嘅驚人跳躍力先過到版，例如由地下跳上2樓，或者跳去斷開走廊嘅另一端，真係無跳九里嘅能力都過唔到！呢套二代奈米生化裝仲有樣High爆能力，只要開動隱身功能，就可以靜靜雞行去敵人背後偷襲，不過一開槍就會現形，醒水就搵定Cover喇！
12人網上開片
除咗套生化裝大升級，今集武器附件亦勁多嘢玩，例如可以加入滅聲器同瞄準器等，當然用得唔着時，隨時影響你攻擊能力，所以要不時睇住武器分析表，Check實自己嘅能力先好玩！
今集另一重點係上網連線對戰，最高支援12個戰友同時開片，採用EA專用伺服器，共有6種遊戲模式。每個玩家仲可以安裝3種不同技能，例如加速、穩定度等，唔似其他同類Game，淨係靠支槍亂射咁悶。
柏豪：「好似喺現場咁呀！」
《末日之戰》由PC平台起家，今次推出續集終於殺入PS3同XB360兩大家用機平台，不過咁都未夠皮，仲要支援埋3D顯示。EA喺發佈會請咗周柏豪即場試玩，話明屋企未有3D裝置嘅佢，試過大讚好似親歷其境：「畫面好震撼，譬如爆炸場面、槍械嘅上彈感覺同聲音都好真實。」機迷柏豪都讚Like，值得考慮入手啦！
Profile
主機：PS3/XB360/PC
類型：射擊
遊戲人數：單機1人/線上2-12
