英國人十幾年前下旗撤出香港，表面上對香港事務無再指指點點，不過，八方發現在英國聯合政府執政嘅自由民主黨（簡稱：自民黨），近日卻在香港「插旗」，喺呢個前殖民地成立首個海外支部，目的竟然係香港人碰不得嘅公投！
香港自古以來就係中國領土，英國執政黨東來搞公投，唔通以為香港仲係反共橋頭堡、革命基地？八方睇到資料，原來英國自民黨去年11月已經想插旗香港，現為英國副首相嘅自民黨主席克萊格（NickClegg）更表示好重視香港支部。
今年剛好係辛亥革命100周年，八方即時聯絡英國自民黨香港支部主席TomHope，問佢如何支援香港人「起義」？阿Tom透露，自民黨香港核心成員只有8人，黨員10人，暫未有正式辦公室，但已辦理註冊手續，唔怕被港府掃場。
已經辦理註冊手續
阿Tom又話，自民黨香港支部主要工作係做選民登記，當然唔係香港區議會同立法會選舉啦，而係搵在港英國人登記做選民。事關本年5月，英國會就是否改變選舉制度進行公投，若公投結果支持改革，對自民黨有利，因此佢哋好重視每一票，遠赴海外拉票。據阿Tom講，香港潛在合資格登記做選民嘅英國僑民逾萬人，「係一個好重要的數目」。
香港搞五區公投遭土共同劣質官員砌詞鬧爆，英國公投光明正大，5月公投全英選民會選擇維持現有嘅「相對多數決制」，抑或改用「選擇投票制」，投票結果對英國政局影響深遠，有學者指若英國改行「選擇投票制」，自民黨最多可在國會增加22席，影響力大大增加，難怪自民黨咁緊張，要到前殖民地搶選票。
一般香港人冇得做英國選民公投，不過，阿Tom話入黨應該無問題，加入英國自民黨每年會費盛惠30鎊，入黨後可做香港支部成員，有興趣者可睇佢哋網站 http://www.libdemsabroadhk.wordpress.com
mailto:[email protected]