中日混血兒裕美的家鄉正是地震重災區之一茨城，不過她沒有返過家鄉，因她自幼跟父母在山口縣生活，直至小學六年級、即11歲因父母仳離，她隨母返港生活，自此與日籍父親和田具久失去聯絡。
兩父女現有10多年沒來往，日本東北大地震，裕美馬上想起父親，她說：「我一直冇爸爸嘅聯絡方法，我哋咁多年都冇改屋企電話，但前排改咗，佢想搵我哋都搵唔到。於是我上網打爸爸個名，之後喺網上留言，如果兩三個月後佢仲唔回覆，我就會聯絡領事館，希望佢哋幫到手。」
掛念叔叔嬸嬸
裕美07年在日本東北拍攝旅遊節目《雪影移城》，她曾到當地尋父，她說：「我拎住個地址去搵爸爸，但已經搬走咗，之後我都唔知用乜嘢方法先搵到佢。其實我一向都唔係咁鍾意爸爸，關於日本嘅嘢都唔係咁鍾意，但係大大吓，心入面嗰份憎恨慢慢減少，覺得爸爸家年紀大，家佢應該有60幾歲，我好想喺有生之年再同佢見面。呢次地震，好多人冇咗屋企同家人，真係好心痛，我嗰刻都諗爸爸安唔安全，仲有一對叔叔嬸嬸喺我細個時成日照顧我，我都好想知佢哋現時情況係點。」
拍攝《雪影移城》時，裕美曾到過災區之一福島，她說：「嗰度環境好靚，係一個好寧靜嘅地方，好似一幅畫咁，嗰度啲人好nice，就算知道你唔係當地人，都會好主動向你笑同打招呼。今次日本地震，我睇新聞影住福島嘅情況，我真係picture唔番當日嘅畫面。」