李澤楷（小小超）同梁洛施早前宣佈分手，消息傳出後，有傳話梁洛施會復出拍片，件事已發生咗一排，梁洛施同小小超都未公開露過面，而噚日小小超終於現身，但佢一發現有記者，就即刻閃人。
已故鋼鐵大王龐鼎元嘅大新抱陳燭餘早前逝世，噚日佢家人喺中環聖約瑟教堂搞追思會，有大批名人出席，包括周梁淑怡、蕭永豐、張燊悅老公楊哲安等。
行側門離開
追思會喺下晝三點開始，儀式一直做到近五點，眾人陸續離開時，喺人群中見到小小超自己一個人，佢個樣睇嚟好傷心，喊到連個鼻都紅埋。不過，小小超依然對鏡頭好敏感，一發現有記者，佢就火速縮入禮堂，再喺另一邊側門離開。
同場喊到鼻都紅埋嘅，仲有紅姑鍾楚紅，佢拎住早輪鄭秀文同劉嘉玲都用過嘅一個RogerVivier手袋現身，但佢對記者問嘅問題都冇乜反應，只係保持微笑上車離開。