噚日有日本傳媒嚟到中海油（883）嘅業績發佈會踩場，質問董事長傅成玉（圖），有關公司日前宣稱喺中日有主權爭議嘅東海春曉油田採油，見慣大場面嘅傅總一於冇有怕，仲借呢個機會「訓導」吓個記者。
傅總話，中日喺東海開採方面一直有協議，兩國政府嘅協議一直冇變，公司亦冇偏離到有關協議，但日傳媒成日作出無中生有嘅報道，唔單止對兩國帶嚟感情上嘅傷害，仲破壞咗中日嘅友好關係，搞到兩國關係咁緊張，希望佢哋可以為促進中日友好做番多啲嘢。
日本大地震成為近日全球嘅焦點，傅總不忘加兩句，話向日本送上慰問，仲會透過日本合作夥伴，向當地捐獻咁話。