最近盛傳電視圈有個一線演員Y先生，返內地拍劇時染到愛滋病，搞到女星人人自危，要避免同Y先生有親熱戲。噚日無綫新劇《女拳》喺銅鑼灣世貿中心宣傳，大家都對Y先生嘅事議論紛紛。
恨做Y先生
講到Y先生，馬國明好抵死咁話：「最衰我個名冇Y字，如果唔係可以順便宣傳吓《女拳》，我冇聽講過呢件事，咁究竟係邊個？我都想八吓！」馬明仲向所有女星大派定心丸：「好多女同事對我OK，如果有親熱戲，聽到係我都會OK，唔會話唔好囉。我信譽良好，暫時冇人會拒絕我，咁我梗係唔會拒絕女同事喇！」
女藝員又點反應？同唔少一線男演員做過對手戲嘅陳法拉話，冇聽過呢個傳聞，更加冇馬明咁幽默，佢好正經咁話：「錫嘴係唔會傳染，呢個係常識，不過如果知道自己有傳染病，就要有專業操守，唔知就係另一回事，知就要同劇組講。」
法拉少激吻
法拉義正嚴詞，唔知佢怕唔怕有事，又會唔會小心啲？佢即刻好小心咁話：「我好少拍親嘴戲，咁電視尺度好少少，我多數都係掂吓嘴，錫面，好少激吻。」
