學武,原來唔一定要去武館,去球場一樣得。好似睇成都謝菲聯前日下晝對四川都江堰場波,一場波變群毆收場嘅友賽,咩「虎尾腳」、「如來神掌」、「穿心腿」全部出齊,對學武之人嚟講簡直係目不暇給。
謝菲聯個澳洲籍教練洛瑞,睇完一場武鬥之後目瞪口呆,忍唔住講句:「我覺得佢哋適合去打拳擊。」成都謝菲聯係中超隊、四川都江堰係中乙隊,明明級數有別,有咩好鬥?偏偏好幾位都江堰球員都係謝菲聯棄將,唔難估計有人想踢爭氣波,落場前已有一團火。
話明級數有別,場波踢得30分鐘,謝菲聯就憑石俊入波領先,但謝菲聯唔知領先兩球定三球時(國內傳媒說法不一),總之場波勝負已分,原來係另一場「比賽」開始。當謝菲聯隊長李剛同都江堰嘅張燁爭波齊齊跌落地,李剛後腳踢中對方心口,起身之後互罵,李剛先推一推對方,而張燁就摑對方一巴回敬。就係咁,維時大約10分鐘嘅武鬥一觸即發。
兩隊加埋廿幾人將畢生武學修為盡情施展,據在場人士講,當時有人喊打喊殺,大叫「係男人就打!」在場嘅都係男人,好多人被煽動出手。之前施展「如來神掌」嘅張燁成為眾矢之的,但佢始終唔係龍劍飛,結果被打到頭破血流,被送入「廠」治理。
呢場武鬥令球賽腰斬,都江堰職球員就搭隊巴返歸,而謝菲聯無幾耐繼續練波,好似成件事冇發生過咁。謝菲聯董事長田中全就話會嚴懲相關人士,至於都江堰教練劉斌個答案就搞笑啲:「打交好正常,我會教育佢哋,但唔會處分,叫得做打交,就唔好講邊個啱邊個唔啱,雙方都有責任,希望件事就咁算。」咁都得?
都江堰三日打兩鑊
得!原來四川都江堰兩日前至同新疆全運隊友賽時打交,兩年前友賽對謝菲聯又火藥味濃,雙方球員多次鞋底對鞋底,又發生球員推撞。呢隊波,以後仲有邊隊敢搵佢哋拍跳?