求驗客手記:老費、柏天尼都插歐聯波飛真貴! - 求驗客

求驗客手記:老費、柏天尼都插
歐聯波飛真貴! - 求驗客

8,900蚊可以做啲乜?咪夠香港一個四人家庭返大陸或者去東南亞國家,慳慳哋玩幾日囉。但如果用嚟睇今年歐聯嘅波飛,咁又買到幾多張呢?答案係4張,仲要唔係4張都係大人,而係兩張大人兩張細路。
歐洲足協由上季開始將場歐聯決賽,由禮拜三晚搬去禮拜六晚舉行,目的係想多啲一家大細入場睇波,但原來係講一套、做一套。今季歐聯決賽喺5月28號喺英格蘭溫布萊球場打,早排進行網上訂飛(由2月24至3月18日),票價分4種,傷殘人士收80鎊,最貴同最平就係300鎊同埋150鎊,而中價飛則係225鎊;至於一個大人加一個小朋友嘅家庭飛就賣338鎊(中價飛另加113鎊)。如果一家四口諗住入溫布萊睇波,齋門票埋單要成676鎊,計埋26鎊嘅網上訂飛行政費,總數至少要702鎊,維起要成港紙8,900蚊。

歐洲足協受壓仍企硬

曼聯領隊費格遜早前就話,09年喺羅馬進行嘅歐聯決賽(巴塞勝曼聯2:0),最平嗰隻係賣80鎊,但家陣就要150鎊,所以佢認為歐洲足協擺明掠水,完全唔考慮球迷的經濟能力。另外,就連歐洲足協會長柏天尼都出嚟話票價唔相宜,佢咁話:「我哋真係要檢討吓啲票價。」雖然歐洲足協受壓,但喺日前就企硬唔減價。佢哋秘書長恩芬天奴話:「溫布萊啲票價一定唔會變。」
歐聯決賽冇錯係有今生、冇來世,如果係巴塞對車仔,當然係物有所值,但若然係由史浩克對薩克達,一家大細用成9,000蚊去睇,呢一刻值唔值博呢?攞筆錢去泰國、澳門、台灣或者大陸玩幾日好過?見仁見智啦!