「facebook革命」搞到埃及立立亂，當地股市仲要停咗差不多7個星期，隨住前總統穆巴拉克落台，局勢開始平復，埃及證交所噚日終於決定今日（星期三）復市！
縮交易時間推新停板機制
不過，交易所主席MohamedAbdelSalam就講到明，復市之後可能係咁跌，所以就將每日交易時間由原先4個鐘縮短到3個鐘，希望減低市況波動喎。
唔止咁，佢仲話會有新停板機制，如果當地嘅EGX100股票指數升跌超過半成，股市就會暫停交易半個鐘，若果上落超過1成就提早收市，佢承認因為想沽貨嘅投資者眾多，個市睇嚟會持續跌一排，但係長線佢係睇好嘅，佢話跌到咁上下，啲外資同專業投資者就會喺低位撈貨咁話。