中國人，應該係全宇宙最鍾意囤積居奇嘅民族！
03年嗰陣，話板藍根可以防沙士，即刻有人炒板藍根；前年話八角可以防豬流感，八角又炒起；上個禮拜話鹽同碘片可以防輻射，炎黃子孫驚執輸嘅性格，又再次表露無遺。
咁都未算，原來佢哋一早囤積埋藥材，而且仲炒貴晒，影響埋人哋做生意。
神威藥業（2877）主席李振江（圖）話，內地藥材越嚟越貴，最主要都唔係自然災害造成，反而係好多行外人囤積藥材所致，佢話房地產商都有囤積，意圖牟取暴利！咁點先可以令藥材價格唔好升得咁癲，李生好無奈咁話，要靠政府出手先搞得掂，老百姓應該仲要捱貴藥……但係咪應該叫中央控制咗班房地產商先會易搞啲呢又？