中台港澳人民居然瘋狂搶鹽，令人哭笑不得，唔怪得內地網民有「無鹽以對」之言，日本人在災難中，都冇搶鹽炒碘，點解中國人身在福地（目前仍然如此），反而咁失禮死人？一九八三年有香港人試過搶購廁紙，今天有人搶購鹽，恐慌驚執輸心態始終不改。
搶購鹽搶購海帶搶購醬油，都話與民生有關吖，居然有人搶購吉品鮑，就真係阿奇生阿奇。冇錢就唔食吉品鮑啦，唔食唔會餓死，偏偏有人去搶，足見香港有幾多有錢人。但係鮑魚癡以後大概要戒口咯，恐有錢都冇得食，除非早已在家儲存了幾公斤。呢日在陸羽飲茶，聽見一位茶客講，岩手縣一個鮑魚場東主在三月七日嗰個禮拜來港自由行兼促銷吉品鮑，一間專門店一口價向佢地買入一百七十公斤，三月下旬交貨。點知東主父子兩人在三月十日返回日本，第二日就遇上地震海嘯，岩手縣受到極大衝擊，東主父親受傷，兒子死亡，鮑魚場盡毀，香港鮑魚專門店老闆為之傷感不已。「東瀛遊」董事禤國全在電台節目講岩手縣係吉品鮑主要來源地，現海岸盡毀，甚或已經陸沉，三幾年內根本無法恢復，岩手縣吉品鮑或成絕響，有存貨嘅店舖賣一件少一件。
查小欣在佢專欄話（開玩笑啫啩）不如碌爆卡，盡情享受生活，預咗唔還，今日唔知明日事吖嘛，日本人點會估到重遇戰時困境嘅啫。查小欣似乎講得有啲極端，但仙台海岸的確遭受嚴重摧殘，市民可極短時間內家破人亡，傾家蕩產，又似乎今日有酒今朝醉嘅生活態度未必錯。仙台一位富豪在三月十一日一小時之間冇咗盤生意（寫字樓倒塌，被水冲走），家居別墅浸在海中如殘垣敗瓦，兩架私人飛機泊在仙台機場與其他飛機一齊被海嘯捲走，僥倖嘅係逃生及時，執番條命，人生如此無常，教人唏噓。上星期本欄引用蘇東坡前赤壁賦：「寄蜉蝣於天地，渺滄海之一粟，哀吾生之須臾，羨長江之無窮。」精通詩文嘅大編輯來電指正：「喂，蘇子與客遊赤壁，客有感而發，非蘇子之言也，蘇子講逝者如斯，而未嘗往也……」知嘅知嘅，不過引述嗰四句，實在太出名，昔日國文老師講完又講，於是一般人入晒蘇東坡數，左丁山亦係咁啫！