自從舊年當選央行貨幣政策委員會委員之後，李稻葵（圖）就成為當紅炸子雞，成個人行發言人咁款，任何人行嘅政策動向，市場都會搵佢分析一番。但當紅背後，其實都有辛酸嘅一面！
李稻葵噚日喺科大嘅中國經濟發展論壇度話，當今中國最大嘅挑戰，係社會張力增加、收入分配不均、樓價高企等等，帶嚟唔少民間不滿情緒；加埋社會湧現一批高學歷嘅年輕一代，對公共事務有更積極嘅投入同意見，「點解政協、人大代表唔係我！」社會湧現大量民間意見，如果對政府政策唔滿意，佢哋會喺網上攻擊有關官員，當然好快會被刪除；但網民同時亦會攻擊好似佢呢啲經濟學者，認為經濟學家係政策背後嘅推手……好彩時間有限，否則樹幹都俾佢呻斷呢！