四叔李兆基前日增持恒地（012）嘅消息曝光之後，恒地噚日成為逆市奇葩，升咗差唔多3%，如果你係「亞洲股神」信徒嘅話，應該賺咗餐茶；若然你冒險精神再多啲，噚日一早買埋恒地自家出嘅末日輪（879，恒地紅利認股權證），單日已經執三、四成，贏埋餐豐富晚餐。
咁如果噚日無跟到「亞洲股神」落注又點呢？唔緊要，仲有機會！根據港交所權益披露顯示，四叔增持似乎停不了。佢老人家喺呢個星期一，以平均價48.217元增持咗351.1萬股恒地，使咗1.69億，家持股量升到65.78%。連同上星期五嗰次增持，四叔其實喺連續兩個交易日，掟咗4.5億掃入946.3萬股恒地，家陣揸住14.314億股。
末日輪行使價58蚊
如果以末期息7毫子計，四叔淨係收息，已經有十億銀，好大機會成為今年嘅收息王。
咁四叔增持，有咩玄機呢？Well，隻末日輪噚日爆升46%，成交209萬唔算多，隻輪行使價58蚊，6月1日到期，較現價50.05元有相當溢價，若然買咗879而恒地股價又唔升嘅話，879就會變廢紙。
有缸湖中人話，四叔就算再增持都唔令人意外。至於華華呢啲平民，都可以跟住落注嘅！
李華華
mailto:[email protected]