噚日華華唔覺意瞄到有兩隻股份升到飛天，一隻係南興（2997），另一隻係中國3D數碼（8078），前者爆升4倍後節節後退，開市先追嘅話，輸多贏少；反而後面嗰隻越升越有，全日升夠1.5倍，夠晒誠意！8078係做咩o架？咪就係拍《3D肉蒲團之極樂寶鑑》嗰間囉！
根據早前公司話事人蕭定一（圖）描述，套片單係賣埠已經有錢賺，仲話已經有好多同胞組團南下「考察」，而華華身邊唔少男女老少，都諗住去觀摩一下，睇吓有幾3D、有幾極樂。咁套戲未上畫，股價先轟動，咩原因？缸湖中人話，原來係同個「除」字有關……唔好心邪，係除權唔係除衫！隻股噚日lastday供股除權呀！