放咗兩個月大假嘅容祖兒，噚日復工到灣仔出席「香港亞洲流行音樂節」嘅記者會，同場仲有林俊傑、棒棒堂同專程由韓國嚟嘅SuperJunior-M，搞到現場逼滿fans。叉足電嘅祖兒果然特別醒神，同埋唔知係咪近得多外國人，連個下巴都兜咗，成個人靚咗唔少。祖兒透露呢兩個月先後去咗法國、英國、德國同紐約，提到同佢傳斷背情嘅何韻詩日前默認同佢去旅行，祖兒就話：「唔止佢，仲有其他朋友，難得有假期梗係搵啲好玩嘅朋友，阿詩係其中一個，佢只係同我去英國一站。」
否認向Mani請罪
不過有傳祖兒同阿詩喺荷蘭過情人節，祖兒喺當日貼咗張鬱金香嘅相，佢否認話：「情人節我喺法國，去咗朋友屋企食飯，啲花係自己買，大家唔好誤會。」祖兒仲透露喺當地有男仔向佢搭訕。至於紐約嗰站，有傳祖兒因激嬲經理人Mani，所以專程去當地搵喺嗰邊讀書嘅Mani請罪，不過佢又否認：「梗係唔係，我同Mani唔係今日先識，大家嘅感情唔會咁易打破，我先唔會坐十幾個鐘頭機去請罪。」
同場嘅SuperJunior-M姍姍來遲，聲稱因塞車足足遲咗個半鐘，所以幾個成員一上台要立即賠罪，喺後台亦都同其他歌手道歉。其實幾位成員嚟到香港機場時，現場有過百fans接機，搞到鬼咁混亂，足足擾攘20分鐘先可以上車順利離開。
