下個禮拜二，日本國家隊同日聯聯賽選手隊會喺大阪進行一場慈善賽，為日本災民籌款，並且振奮吓人心。日本國家隊名單一早已經公佈，海外國腳亦陸陸續續回到國內；至於日聯聯賽選手隊，噚日亦公佈名單，結果同早前預計差唔多，前國腳好似中村俊輔、小野伸二，同埋田中鬥莉王等都入選，而從未參加過世界盃嘅前「國寶」三浦知良（圖），亦會登場。反而，一直有傳會義助嘅中田英壽，最終都冇份。賽事門票會係禮拜三正式開售，我求大俠相信，以日本人嘅愛國性格，波飛唔使兩、三個鐘頭會賣清。另外，日聯賽會主席大東和美透露，聯賽下個月23號重開，球迷到時又有好波睇。