黃金集團（1031）噚日股東會，通過向大股東收購金利豐證券業務，主席朱沃裕同朱太李月華一手湊大嘅金利豐，終於完咗上市夢。
朱氏伉儷固然十分happy，但華華就覺得，朱生應該比朱太更happy，事關佢真係娶到個賢內助！
好似噚日大家幫佢哋影相咁，無論點睇都係女強人嘅朱太，唔係先執正自己，而係幫老公整整條有啲「縐」嘅呔先，真係完全發揮中國傳統女性嘅美德！
日人仍堅持綠燈先過馬路
講講吓，大家講到日本311大災難，朱生話佢當時正係同東京嘅業務夥伴進行電話會議，個會議由香港時間下晝一點開始，大地震喺46分鐘之後發生，當時佢突然聽到電話筒傳嚟尖叫聲，咁梗係有大件事啦，隔咗一陣，電話筒再次傳嚟「Wearestillsurviving！」。
喺咁嘅環境之下，暫停個會議係理所當然嘅，點知對方竟然話唔緊要，傾埋幾句先，結果講多咗幾分鐘個會議先至結束！咁武士道精神，連條命都可以擺埋一邊唔理住，呢單生意應該好大銀碼喎?!
朱太補充話，佢個東京朋友同佢講，地震海嘯之後，夜晚東京街頭人迹罕至，人同車都唔多，但係當地人依然堅持交通燈轉綠色先過馬路……呢啲文明同自律，唔知香港人幾時先會學得到呢？
李華華
mailto:[email protected]