煮意大利粉唔好過冷河，但教波就應該喺適當時候，將有問題嘅球員過一過冷河。意大利國家隊教練柏蘭迪利點兵唔預迪羅斯、巴洛迪利，係就係同呢兩位最近躁狂嘅狂人斬纜，不過斷估係暫時性。問心，今時今日藍軍仲有幾多棋子用得着，柏蘭迪利心中有數囉。
柏帥對曳仔有妙計
喺柏蘭迪利前日公佈大軍名單前，已經好似人哋登晒廣告同某人脫離關係咁，事先張揚一定唔會召喺歐聯對薩克達向人開踭嘅羅馬中場迪羅斯，而曼城前鋒巴洛迪利上星期喺歐霸嗰腳穿心腿，累曼城以寡敵眾贏唔夠數出局，柏蘭迪利點會走漏眼？仲唔斬纜，容乜易好似文仙尼咁一身蟻？一如所料，兩個果然喺今次點兵名落孫山，即係歐國外對斯洛文尼亞、友賽烏克蘭都冇份踢。
當年柏蘭迪利教費倫天拿，簡直係球壇版正生書院，佢將好多失意或犯過錯嘅人，好似梅度扶番起身，所以處理問題球員絕對有一手。家陣意大利足球衰落，佢都冇乜兵可用，棄用巴洛迪利、迪羅斯，入番隊嘅都係卡斯辛奴、馬治斯奧等人，即係用嚟用去都係嗰班人。
迪羅斯認衰夠淡定
今次新入選球員係嚟自切塞納嘅馬高柏洛路，喺香港，斷估唔會超過100人聽過佢個名。至於大軍又以祖雲達斯為「大戶」，總共有6個入選，睇祖記頹到仲要靠老兵迪比亞路死拼至打贏布雷西亞，可以想像柏帥手上棋子真係好緊絀。所以，相信迪羅斯、巴洛迪利喺不久嘅將來又會奉召入伍。唔怪得迪羅斯認衰之餘，語氣好似定過抬油：「係，喺國家隊係有一套道德規範，我冇遵守，做咗個被傳媒定為『恐怖』嘅行為。希望好快再入選番國家隊。」