我求大俠唔係歧視肥人，亦都唔係批死肥人唔可以守龍，以前本地班霸東方，門將希福特都係大肥佬，身手一樣好好。不過阿積士嘅門將華賀雲（圖），就似乎肥得嚟又論盡嘞；由於阿積士正選門將史基倫保右手拇指骨裂，休息至少9周，可能提早收「咧」，二號門將華美亞又足踝傷，所以阿積士喺前一場聯賽對威廉二世時，已經要靠華賀雲把關，而佢當時嘅表現亦有好多甩漏，好彩球隊最終反勝；不過，周日作客海牙，華賀雲就真係出晒醜。體重達99公斤嘅華賀雲，原來喺荷蘭有個朵，叫「肉丸」；結果佢就失3球，搞到阿積士輸2:3。賭波球迷以後見到華賀雲再落場，就一定追阿積士對家同入球「大」嘞！