「一舖養三代」呢句話真係無講錯！舊年成為飲食界聖典《米芝蓮指南香港澳門2011》一星級食肆嘅銅鑼灣霎東街何洪記，原來老闆將自用37年嘅家傳舖位，以1億元賣咗俾資深舖位投資者黎永滔。
74年35萬買入勁賺285倍
何洪記個舖喺74年用35萬蚊買入，家陣即係一鋪勁賺285倍！等華華計計數先，佢哋馳名嘅雲吞麪賣29蚊一碗，如果每日賣到500碗，仲要唔計人工水電煤，都要賣成19年麪，先可以賺到1億咁多！
黎永滔承認買咗何洪記間舖，6月就會成交，到時就會放租，咁何洪記6月咪……﹖何洪記老闆娘何太Batty話，消息一出，班熟客係咁打電話嚟問，係咪就快冇雲吞麪食﹖Batty話佢都好困擾，但就拍晒心口同華華講「到6月嗰時，你嚟番霎東街2號呢度，仲可以幫襯！」不過，間舖係咪真係賣咗，佢話間舖係家族嘢，自己唔知咁多喎！
查實華華收到風，何洪記賣舖嗰陣加入咗特別條款，就係售後租回兩年，月租逾12萬蚊。即係話，未來兩年，喺同一個地址，仲可以食到佢哋嘅雲吞麪、干炒牛河呢啲「一星級」美食。
售後租回兩年
點解何洪記會突然賣舖？權威人士話，最大原因唔係生意問題，而係不敵不斷下調嘅強拍門檻。權威話，其實何洪記地舖上面啲舊樓，好多已經畀人落晒釘，一個唔覺意隨時畀人強拍間舖，到時要急急搵舖搬好麻煩；反而家可以一邊喺原址做生意，一邊物色新舖，實行慢慢揀。
何洪記可以話係名人食堂，好似特首曾蔭權就幫襯咗廿幾年，連前高官陳方安生、教育局局長孫明揚都成日捧場！以華華睇，假如有一日何洪記真係唔開門做生意，照計班「粉絲」（包括華華嘅父母）會傷心過姓何嗰家人囉！
開業65年
由賣街邊檔至揚名國際
何洪記喺1946年由何釗洪創立，最初喺灣仔馬師道賣街邊檔，主打雲吞麪。後來闖出名堂越做越旺，喺1954年搬入軒尼詩道街舖經營，但係因為幢樓要拆，喺1974年用35萬蚊買入霎東街個舖，一直做到家。
何釗洪個大仔何冠明喺1984年開始接手成盤生意，仲喺1996年創立正斗粥麵專家。佢之前同傳媒解釋，唔用何洪記個名去開分店，係因為即使衰咗，都唔會影響阿爸個金漆招牌！到目前為止，何洪記同正斗都係由何冠明倆公婆夫妻檔經營，何太馮惠明主力負責打理何洪記。
何洪記雖然出咗名幾十年，但係直到2008年尾先俾米芝蓮納入推介級別，到舊年公佈嘅《米芝蓮指南》先至由推介食肆「升呢」至一星級，揚名國際；而正斗仲係推介食肆，早喺舊年已經進軍內地市場，喺上海浦東國金中心開咗第一間分店。
李華華
mailto:[email protected]
