儘管日本大地震兼全球缺貨，日產巨肺電車Leaf終如期到港。話佢巨肺全因內櫳勁闊落，大大架似私家車，車底一排排鋰電先最堅，叉滿電可長跑160km，而且全無廢氣零污染！攞零蛋，從未試過咁驕傲！
記者：徐影龍
攝影：譚盈傑
Model：Hidy@GMEModels
不再是試驗品
早幾日政府搞咗場大龍鳳，財爺現身撐環保車，雖然匆匆上台講幾句就走人，不過睇到Leaf的確可帶起電車個勢。
Leaf上年已率先喺歐美開賣，供不應求到日產要暫停接單，可謂未出先紅！無計，賣相靚仔兼車廂闊落，的確比目前香港見到嘅蚊型細車有優勢，電車唔再係試驗品！
目前全港只得一藍一白兩架Leaf，拍埋一齊影相頗有藍天白雲寓意。我覺得只要唔係銀或灰，Leaf噴乜色都咁好睇，因為車身有子彈頭般嘅流線設計，車前一對凸眼青蛙頭燈，勁似保時捷之餘，又有番同廠Juke嘅突破意味。較特別係由於無引擎，所以連鬼面罩都慳番，係咁意加個長長氣壩同霧燈點綴吓，靚得嚟又有新意。未試車，已對Leaf充滿好感，個個劈頭第一句都係問：「香港幾時有？」目前政府及太古等大機構，合共訂咗200架，雖然日本遭逢不幸，但暫時仍未影響付運到港計劃。至於公開發售日期，代理話有望喺今年內呢！
科幻內櫳靜得出奇
由於有廿幾個傳媒得一日拍攝時間，每人得45分鐘，對住如斯尤物，只能短聚淺嚐，唔再同人吹水，拿拿聲跳上車試揸試坐。珍珠白車身，配雪白內櫳同高級絲絨椅，已令人好感叢生，配上泛着藍光嘅中控台、錶板同波棍，又有種未來科幻感，量產車嚟講都算出位喇！
圍住科學園兜咗幾個圈，車廂寧靜係電車基本要求，但Leaf靜到連我輕踏油門都聽到，指揮燈響聲又比平常大，我仲隱約聽到兩隻蚊喺度咬耳仔，係咪靜到開始有啲幻聽？最大驚喜係個電摩打，先天優勢令到109匹馬力，居然榨出280Nm扭力，相當於一架3,000cc嘅車，起步相當有力度，短途小試，一樣玩得好開心。官方耗油數字為$0.15/km，約等於一架1,500cc車嘅1/10，唯一問題係$42萬車價，略嫌稍貴，不過Leaf設備同性能均相當不俗，加上幫你慳番9/10油錢，長遠計點都圍到條數，仲有他日立法停車熄匙，個個停喺條街焗熱氣，到時就羨慕你啦！
同胞有Say
NissanLeaf
馬力：109ps
扭力：280Nm
傳動：CVT無段波箱
極速：145km/h
充電：快充30分鐘達80%、全充需8小時
續航：160公里
售價：約$42萬（預計年尾開售）
查詢：28035333（合誠汽車）