日本福島爆發世紀九級大地震，台灣演藝界上個禮拜做咗個賑災騷，籌到7.8億新台幣（約2億港元）善款。由成龍、曾志偉、岑建勳擔任發起人嘅香港演藝界，連日嚟已經密密開會商討賑災騷嘅事，志偉噚日喺中環為徐靜蕾一個減肥活動做司儀，就講咗賑災騷嘅最新進程畀大家聽。
搵人作歌
志偉話：「家計劃月底或者下個月初舉行，最主要要落實場地，要同政府嗰邊傾。今次賑災騷同以前好唔同，除咗表達關心同祝福外，仲要帶出好徹底嘅訊息，希望所有地球人都會有反思。」據悉賑災騷會喺下月1號或2號舉行。
之後，志偉又話：「今日（即昨日）會繼續開會，希望星期四開到記者會公佈詳情，家搵緊音樂界嘅人作曲填詞，寫一首全新嘅歌送畀日本嘅朋友。」