英格蘭國家隊領隊卡比路，周日就公佈26人大軍名單，備戰周六對威爾斯嘅歐國盃外圍賽，朗尼、林柏特、泰利呢啲頂級球星，入選梗係冇問題，不過就有新面孔，就係狼隊翼鋒馬菲查維斯（圖）。24歲嘅馬菲查維斯入圍，當然同阿當莊臣、禾確特因傷退出有關，不過都唔好抹殺佢今季嘅努力，亦都證明就算踢弱旅，一樣有機會畀卡比路睇中。