周慧敏（Vivian）一連兩場的紅館個唱前晚大功告成，當年跟Vivian合演經典劇《大時代》的劉青雲現身，令她感動落淚。剛跟許志安復合的鄭秀文（Sammi）任嘉賓，Vivian取笑她愛食鹹牛脷，Sammi即怕醜甜笑，更不執輸指Vivian的身材比自己的平胸好，盡現立體感。
周慧敏兩場「DeepV．25周慧敏演唱會」前晚在紅館圓滿結束，王馨平、黎瑞恩及莊思明等捧場，倪震亦在台下支持老婆，上台嘉賓有蘇永康、張敬軒和古巨基等，打頭陣的有跟Vivian合演劇集《大時代》的劉青雲，慳妹及方展博重遇，青雲更學角色擲紙飛機到台下。
見方展博流淚
Vivian見青雲即感動落淚，青雲送上紙巾並搞笑說：「考慮咗好耐先嚟，因為怕人話我，你（指Vivian）個樣同當年一樣，而我就……以前都可以話金童玉女，家係美女與野獸。」現場又播出《大》片段，臨走前青雲笑謂：「我走喇，衰婆。」
剛在雲頂舉行完個唱的鄭秀文前日才返港，晚上即現身任嘉賓，並掀起高潮，她跟Vivian合唱《不要驚動愛情》，唱畢Vivian取笑Sammi跟許志安復合：「我都鍾意食豉油西餐、豬髀同鹹牛脷。」Sammi聞言甜笑說：「唔知點答你，我怕醜。」現場播出當年兩人同台演出片段，Sammi自嘲超肥，Vivian讚她現在超瘦，Sammi風騷扭腰說：「你都瘦呀，但係你身形立體好多。」Sammi獨唱完後說：「本來想今年喺紅館開騷，但個期爆晒，出年先嚟睇，2012世界末日前睇埋我個騷先。」
首獲倪震稱讚
尾聲時古巨基介紹日本女星柏原芳惠出場，Vivian不知情下表現激動，柏原芳惠透過繙譯說：「Vivian同觀眾畀咗好多鼓勵畀日本朋友，希望30同40周年大家都支持佢。」柏原芳惠心情比前一晚輕鬆，還有唱歌表演。
慶功宴上問Vivian為何不請倪震上台？她說：「想佢安心睇騷，佢有sms讚我，第一次咋，佢話以我為榮。」
採訪：王連連 攝影：陳俊強