2008年金融海嘯嗰陣，因為愛國而入股高盛嘅股神畢菲特，最近終於得到回報！前幾日，高盛獲得美國聯儲局批准，可以贖回股神手上嘅5萬股高盛優先股，高盛上星期五即時炒起，升2.7%收市。
匿埋避高盛免對方贖回股票
不過，股神自己對高盛要買番佢手上嘅股票，就顯得唔多願意，事關根據當年嘅協議，高盛每年要向巴郡派5億美金股息。佢曾經講過，呢啲收益令佢每秒鐘進賬16蚊美金，一日就賺140萬美金，令佢每聽一次鐘擺聲，都好似聽音樂咁過癮。
股神早就知道聯儲局遲早會批准高盛贖番批股份，所以成日同高盛CEO開玩笑話要匿埋。今次出訪亞洲之前，更話要令高盛刮佢唔到，就好似美軍10年都捉唔到拉登一樣，話明要做「資本主義拉登」，唔知佢可以匿到幾時呢？