日本大地震引發福島核危機，前日日本方面首次公佈福島縣嘅牛奶同茨城縣嘅菠菜都受到污染，打擊咗港人購買日本新鮮食物嘅信心。不過，名模AmandaS.一於冇有怕，前日繼續同意大利籍男友Christian到超市選購日本食物。
前日下晝5點幾，馮仁昭喺中環ifc嘅City'super見到AmandaS.同男友Christian拍住拖行超市，見佢哋又買蔬菜又買芝士、牛扒、雞蛋、醬油同橄欖等等一大堆食物，AmandaS.仲攞住張紙仔照單執藥咁執，買到成部手推車滿晒，好似開大食會咁款。逛足45分鐘後，AmandaS.趁男友排隊畀錢時自己行去買麪包，跟住兩個人再去附近買朱古力。
擔心居日朋友
早幾日有謠傳話食用鹽會被日本核輻射污染，搞到中、港、澳三地掀起一片「盲搶鹽」，馮仁昭走上前問AmandaS.有冇搶鹽，佢就笑笑口擰頭話：「冇買呀。」問佢喺超市有冇買日本食物，佢猛咁點頭話：「有呀！」擔唔擔心日本食物有輻射？AmandaS.就話：「唔擔心，反而擔心我日本啲朋友。」AmandaS.仲話如果有工作去日本做，佢都會照去喎！