一連兩場「DeepV．25周慧敏演唱會」前晚於紅館揭開序幕，身形纖瘦的周慧敏（Vivian）谷胸上陣，甚有睇頭。入行25年的她在演唱會上多謝歌迷的支持，激動落淚，她獻唱新歌《盆栽》時更哭到唱不下去，要重新再唱。
入行25年的周慧敏前晚於紅館舉行個唱，邀請了好友李克勤及日本女星柏原芳惠擔任嘉賓，更請了張敬軒做嘉賓，二人合唱《流言》。
軒仔讚有睇頭
Vivian指軒仔有才華、有幽默感及非常有愛心，軒仔也大讚她說：「我之前同Vivian一齊去探訪，一向覺得佢係玉女、公主，都驚佢頂唔順，原來佢唔係外界睇咁脆弱嘅女仔，佢玉女得嚟，係一個冇公主病嘅公主，女士羨慕你，男士希望身邊有個咁嘅女仔。」
Vivian笑說：「女士都要好似你咁條腰咁幼。」軒仔搞笑回應：「除咗下半身，器官可以忽略，女仔上半身都唔可以忽略，否則唔可以好似你咁deepV，你睇吓你。」Vivian換了多套低胸裙，身形纖瘦的她上圍仍甚有睇頭，穿上芥辣黃裙時更有谷胸效果。
「係我精神伴侶」
一向愛錫小動物的Vivian，於演唱會上紀念早前去世的貓狗豹仔和豬仔，她講及此事時禁不住落淚。她又多次答謝歌迷多年來的支持，她致謝時邊哭邊說：「你哋係我精神伴侶，畀我更有力量去承擔同付出。」之後她唱新歌《盆栽》時，更哭到唱不下去，要重唱一次。
採訪：李珮洳 攝影：仇志德