華遠集團總裁、綽號「大炮」嘅任志強，就快會喺國企老總呢個位退落嚟，早前佢都仲未肯講自己點安排後路，上星期六終於爆響口，話自己會先半退休，去做客座教授。
前日，任大炮出席北京師範大學嘅活動時，獲邀做客座教授，佢話之前推咗幾間大學嘅邀請，因為有公職在身；家陣無官一身輕，去講吓書都無問題啦。
被問到萬科董事長王石去哈佛讀書，任大炮又再發揮寸人嘅本色，佢話：「去讀書，說明他認為自己學習不夠；我要去哈佛，也是講課。」其實，成個內房行業都唔係得佢一個口舌不饒人，SOHO中國（410）董事長潘石屹都借機寸吓任大炮，喺微博問佢：「唔係話辦幼兒園咩？」任大炮即刻嚟一招四両撥千斤，話自己半退做客座教授，全退先至去辦幼兒園。
其實華華都幾唔捨得佢，冇咗呢台大炮，第時邊個同潘石屹鬥噴口水呢？