通脹問題困擾好多打工仔，工聯會月底開倉，不過唔係派米，係同華潤零售（集團）旗下購物網站萬家摩爾合作，喺新界區搞購物優惠周。首場於粉嶺聯和墟和睦路遊樂場舉行，由2月29日至4月3日，朝九晚六點半，之後兩個星期會移師去天水圍同沙田。
有幾百類貨品
工聯會理事長吳秋北話，今次係工會歷來最大規模嘅特惠購物周，每日估計有幾百類貨品，供市民選購，除咗日用品同糧油食品，仲有小部份電子產品，希望幫市民抗通脹咁話。工會喺09年搞過同類活動，當時供應商提供七至九折貨物折扣優惠，今次折扣率肯定好過上次。本港近日出現搶奶粉潮，工聯會話家同供應商聯絡緊，暫時未知有冇得賣。八方相信，柴米油鹽呢啲近日被搶購嘅貨品肯定唔少得。工聯會今次打正旗號開倉扶助基層，小市民梗係拍手掌，今年係選舉年，相信各政黨陸續有筍嘢益街坊。