講真，我並非魯爾的粉絲，但我真的以為他會在皇馬終老。
莫說今天，要球星終生只效力一家球會，從來都不是一件容易的事，當中牽涉了幾多天時地利人和，要幾堅定的性格才足以抗拒了多少誘惑，我們不是當事人，自然不大了解，雖難但仍有不少人做得到。像曼聯的傑斯、史高斯，該可像剛剛退役的加利尼維利一樣，成功地只踢過一家球會。
神級魯爾點解要放！
看到歐聯8強抽籤結果，當大部份人的注意力去了曼聯咁邪抽到車仔，又或者巴塞好命到竟然抽到薩克達之際，我睇實個圖表，個心即時咁諗，「鬼唔望最後決賽係史浩克04對皇馬，仲要由魯爾射入奠定性一球，從皇馬手上捧走獎盃，咁就真係開心咯！」
有乜咁開心？我唔係魯爾粉絲，更加唔係皇馬擁躉，只不過睇唔過眼，戥魯爾唔抵！你睇下數字，魯爾今季加盟史浩克04，踢了25場，有11個入球，兩個助攻，59次起腳，論數字，以33歲的球員計，表現不俗，何以皇馬要放棄他？
魯爾可不是一個普通的西班牙本土球員那麼簡單，他效力皇馬15個球季，上陣550場取得228個入球，兼為西班牙國家隊前隊長，這是不可多得的一等一球星，偏偏皇馬太過現實，竟然在他臨掛靴之際，送走這個我認為可以成為皇馬球會，等同卜比查爾頓於曼聯那種超然吉祥物的人物！
由此可見，英超球會即使純屬市場考慮，不是出於景仰球員的效忠又或尊重歷史，但行為舉動依然惹人好感，起碼曼聯的卜比Sir讓投身職業聯賽的球員，仍可憧憬踼波踢到入董事局這種春秋大夢，即使萬中無一，仍不應扼殺了我們美麗的幻想，是不是該殺？魯爾加油，踢垮你的母會皇馬！
文：盧覓雪