星爺話齋，地球好危險！因為個個相信有世界末日，鹽同豉油都可爭餐死！現實世界有幾多災多難，荷李活班大導一於少理，年年續推一大堆外星災難片，滿足一班鍾意自己嚇自己嘅末日信徒。本周登場有隻《天凶之城》，想睇主角點樣KO「藍光」外星蜘蛛？用Blu-ray煲碟啱晒！
記者：王震遠
生日變死忌
古仔講主角謝樂同女友伊玲去洛杉磯，出席老友泰里生日Party。其間呢對情侶因小事反面，又係咁老套撞正有災難發生！佢哋發現被藍光射中嘅人，會被外星人吸走，有人提議遠離城市逃命，有人主張留喺屋企等待救援，面對人生交叉點，結果戰友就一個一個被吸走；尾段以為主角會葉問上身？打贏外星人？點知錯晒，竟是愛情片結局！
天光易現形
製作班底好猛料！由《阿凡達》視覺特技班底聯手炮製。今次套戲有唔少特別視覺效果，例如飛船在天、洛杉磯大爆炸等，場面華麗之餘，仲帶有大片味道！睇勻全碟，會發現《天》同一般災難片好唔同，人哋嗰啲永遠黑麻麻先打到嚟，《天》偏反其道連氣打足三日！無論天光、天黑都有戰亂場面，黑夜就話暗位無Detail啫，光天白日就乜都現晒形啦！想睇Sharp爆、機械質感CG，天光場口明顯係個試機位！另外，外星人嗰度召喚藍光做得好仔細！電視夠靚仲會睇到極豐富層次感，用藍光碟睇更能呈現圓滑嘅液態狀！
炸飛機試聲
《天》唔只CG做得靚，就連音響都逼真過人。有一幕講述敢死隊揸架戰機，開炮掃射天煞坦克，呢幕最啱試聽DTS-HDMA同DD5.1聲效，聲音由左到右、由遠到近，都聽得出有層次同撕開空氣嘅質感，Sharp到聽出耳油。仲有戲中穿插唔少外星蜘蛛吸走人類嘅場面，睇畫面，個人以極速被異形吸埋身，聽聲真係聽得出短促嘅爆炸力，真係齋聽聲已經值回碟價。
Profile
語言：英語DTS-HDMADolbyDigital5.1
字幕：中文/英文
視像比例：2.40:1
特別收錄：刪剪片段、電影加長片段、3D模擬預演、電影預告片、導演解說、製作團隊旁白
