香港中華廠商聯合會，多年嚟俾人嘅印象，都係穩穩陣陣、作風保守。唔講唔知，老字號選會長，原來比我哋特區政府選特首更文明，「我哋嘅制度真係開放、公平同民主，我哋嘅選舉係計差額同投暗票嘅。點樣迎接香港嘅普選年代，我覺得要由自己做起，畀大家習慣吓選舉，每樣嘢講吓自己理念，爭取吓支持，先會適應新嘅政治環境。」今年尾卸任嘅第38任會長黃友嘉話，根據會制，一屆只得兩年任期兼冇得連任，新一屆會長會喺10月尾選出。
黃友嘉雖然係廠商會會長，但佢並唔係「廠佬」出身，佢本身係芝加哥大學經濟博士、聯僑企業CEO。投資，先至係本業！「我從來唔講投資心得嘅！每個人嘅情況唔同，好似年紀咁，35歲同65歲需要嘅已經好唔同……其實最難係克服羊群心理，大家都知呢個rule，但100個人裏面只有兩三個做到。」佢話自己投資只係「OK」，但自己並唔係嗰兩三個。
買樓要睇住政府政策
咁點睇樓市呢？黃友嘉同意，喺香港地，有樓點都好過冇樓，但買樓定唔買樓，就從來冇話對與錯，「有種心態係今日唔買聽日就會貴，其實邊有話買樓一定唔會錯？唔係話預測，睇番過去十幾年歷史，樓市真係好波動，長時間低迷都試過，千祈唔好以為一定會係咁升！」佢嘅貼士係留意住政府政策，「家已經唔係樓價，而係社會矛盾嘅問題，政府唔好好處理，係可以出好大件事嘅！」
講到80後嘅問題，黃友嘉反問：「80後係點o架？」有兩個女嘅佢，如無意外，係少數幸運嘅80後家長，兩個女讀書自己搞掂，連學費都唔想使阿爸嘅錢。呢個爸爸話，將啲後生仔標籤做80後係唔公道嘅，「80後有啲行為係50後都會有o架，你睇今次嘅財政預算案，咪50後搞出嚟嘅，一鑊泡囉！總之，如果唔想俾人標籤，先唔好標籤自己。」黃友嘉講嘢好直，正如佢自己話齋，佢唔係好適合做政客，佢話：「目前我最重要嘅，就係做好廠商會會長呢份工！」
記者：何凱兒