賭王何鴻燊「分燊家」事件塵埃落定，雖然四房協議細節未公佈，但澳博（880）全年業績就靚到痹，喺大行爭住唱好嘅同時，就俾華華發現瑞信份報告入面，引述咗行政總裁蘇樹輝大派定心丸嘅說話，表明佢同四太梁安琪嘅執行董事地位，喺嚟緊呢年都應該會坐得好穩。
瑞信上星期出報告大唱澳博經營穩固，又將目標價調高到14.9元，但最吸引大家嘅，係報告認為澳博管理層唔再係問題呢個point。瑞信講到咁肯定，原來係因為蘇樹輝喺業績電話會議上爆料，話董事局已經表態，支持四太同佢喺嚟緊4月底嘅澳博股東大會上連任董事。
澳博執董年期係3年，蘇樹輝同另一位執董吳志誠，一直被認定為「四太幫」，吳志誠早喺2009/2010年度澳博股東會上連任。不過，之前「分燊家」風波未平息，市場認為如果澳博大股東澳娛落喺二、三房手上，咁08年入局嘅四太同蘇樹輝，今年就未必可以連任董事，但家冇咗呢個憂慮，「四太幫」地位仍然好穩。