唔同人生階段，需要唔同玩具！BB仔鍾意玩手指，大個啲就鍾意砌積木，再大啲更要靠一堆數碼補品滋潤生活。如果你未戒奶，仲好嚮往童年光景，又唔捨得現代嘅享受，華仁影音新返呢嚿發水LEGO，內藏迷你Hi-Fi，啱晒你！
記者：王震遠
攝影：陳陶鈞
Model：Ruby@PureModels
巨型LEGO迷你音響
當時下細路都鍾意揸部3DS同iPhone做玩具，作為老牌兒童玩具品牌嘅LEGO，都話要嚟數碼一番！平時見開LEGO豆腐膶咁細，今次發水版LEGOStereoCDBoombox，官方數字係普通LEGO嘅10倍體積，就算當佢玩具，放喺房當擺設，一樣型爆！
雖然外表得意，我哋數碼達人點會以貌取人咁膚淺？呢嚿LEGO內置收音機分唇，1.1"屏幕可顯示頻道，型玩跳字式顯示，真係好OldSchool。作為音響組合當然要播到CD，佢支援CDs、CD-R同CD-RW，所以自己燒嘅碟都可以聽番。仲唔夠皮可以用盡佢個AUXIn，接駁MP3等流動裝置，可惜無iPhone插頭，iFans需要額外買個轉換頭啦！
圓潤音色 交到貨
現場即播衞蘭CD試聲，音質絕非玩具級數！機身內置重低音系統，可手動操控開關；音質算幾圓潤，清晰之餘唔會聽得到起噪，作為一台普通流動CD音響，已經對得住街坊，放喺房煲碟、聽歌，算係收貨夠用啦！
除褲USB
睇勻咁多件貨品，小記最想買呢隻USB手指！佢本身係一隻LEGO人仔鎖匙扣，除開佢條褲先知佢係隻2GB手指，新貨上手仲預設一段LEGONinjago影片；不過我最愛死佢個隱性保安功能，正常人又點會無端端幫佢「驗明正身」呢？俾人執咗，都未必知佢係USB手指啦！
LOMOFEEL玩具相機
呢部LEGO相機，外形完全由積木堆砌出嚟！跟機仲加送埋3粒外置LEGO，機頂、機底所有牙位都拮得落，慌你玩唔夠皮！規格亦貫徹玩具機精髓，只得300萬像素！真係隨手拎部iPhone都高過佢；但亦非毫無用處，機身附設閃燈、1.5"屏幕；即場試影，成像的確比普通DC弱雞少少，但佢勝在顏色唔準得嚟又幾有Feel，十足落咗Effect一樣，LOMO終於有人搵你挑機喇！
單粒積木收音機
如果你有Boombox，無理由唔買呢個姊妹作——LEGOAM/FMRADIO。雖則收音機功能完全重複，但佢亦係一嚿積木，底部已預留凹位，任你砌落Boombox度，有得聽有得玩，過癮！
華仁影音（27877992）