林峯和潘霜霜慾照被公開，全城議論紛紛，曾與潘霜霜合作的王晶讚她工作專業「叫佢剝就剝」，杜汶澤、周秀娜和莊思敏均同情林峯被出賣，最好笑是王晶不覺林峯慘，阿澤即揶揄他：「要鬥多相，林峯邊夠你多！」
王晶前晚率領電影《猛男滾死隊》演員杜汶澤、周秀娜和莊思敏等在尖沙嘴出席慰勞感謝宴，眾人談起林峯和潘霜霜慾照，大多同情林峯被出賣。王晶表示曾與潘霜霜合作《財神客棧》，他謂不知潘與林拍拖，又說：「我只知叫佢剝就剝，好專業。」會否開戲給她？王晶說：「冇所謂呀。」他又坦言上網看到潘霜霜身材惹火，在旁的阿澤即說：「咁好條件，就正正經經啦。」
周秀娜戥林峯慘
問阿澤是否覺得林峯被出賣？他說：「覺得呀，但冇法啦。」王晶搭口：「唔係跣，係事實好過，有乜問題呢？」阿澤暗寸潘霜霜說：「搵食艱難，競爭咁大，咁多女仔，我戥林峯慘。」王晶笑問：「好慘咩？」阿澤即揶揄他：「晶哥你就下巴輕輕，以前用菲林機，邊有家咁方便呀，要鬥多相，林峯邊夠你多，時代唔同咗啫。」王晶聞言只笑不語，最後他與阿澤總括說：「真係搵食艱難呀。」
周秀娜也覺得潘霜霜身材惹火，她說：「見到幾好。」有否壓迫感？娜姐說：「我唔會同人比較。」有傳潘霜霜假胸，娜姐說：「我冇睇到咁仔細，會唔會唞唔到氣。」她曾與林峯合作《抱抱俏佳人》，她謂不知林峯拍拖。有否覺得林峯被出賣？娜姐說：「感情事好難講，但有啲人要宣傳嘅話，唔好傷害其他人，希望林峯盡快平復心情，唔好唔相信女人，最重要係感情事唔好傷害身邊人。」
莊思敏質疑假胸
曾隆胸的莊思敏表示肉眼無法鑑定潘霜霜是否假胸，她說：「但佢瞓喺度時就好唔自然。」她自言不會偷拍男友睡着的照片。有人覺得林峯被出賣，她說：「好似處心積慮要攞啲相出嚟證明佢哋拍過拖咁，希望林峯快啲平復心情。」
此外，有傳鄭中基與主播女友余思敏今年結婚，好友杜汶澤說：「我冇聽過，如果係真，我都唔知就好冇面。」
採訪、攝影：卓寶花