約蘇施黃金燕玲飯敍
馮仁昭四圍超：關之琳避鏡頭身手敏捷 - 馮仁昭

近年喺娛樂圈已經處於半退休狀態嘅美人關之琳（之之），近年只係間唔中喺公眾場合露面。前晚7點幾就發現大美人現身銅鑼灣鬧市，佢坐住架7人車去到一間意大利菜館，好謹慎咁左望右望，之後再以9秒9嘅速度入咗間餐廳食飯。驟眼所見之之雖然已經唔使再拋頭露面，但佢依然保養得好好，着咗一條西裝褲以中性打扮嘅佢，配上一對3吋高踭鞋非常有型格。

衝上車擰歪面

喺餐廳逗留兩個鐘之後，大美人見有記者在場，就一支箭咁走出嚟衝上自己架7人車，記者影相時仲特登擰歪塊面唔肯上鏡，反而緊隨佢後面出嚟嘅蘇施黃同佢嘅閨中密友金燕玲，原來佢哋3個約埋一齊食飯，相對之之嘅速度，蘇施黃同金燕玲一前一後就悠閒好多。阿蘇一向識飲識食，未知呢間菜館係唔係佢嘅心頭好。不過自從舊年阿蘇開教人賺兩億嘅講座銷情唔理想之後，佢都有一排冇露面。