善變唔係女人專利，車都可以玩埋一份。好似長賣長有的本田爵士仔，今次再玩翻新變面，雖然唔係誇到認佢唔到，不過經過矯形改造，即時令線條盡現，青春味又再逼埋身。
記者：趙慧敏
攝影：林栢鈞
Model：A.Lin@GMEModels
霧燈小嘴
今次Jazz只屬小改款，矯形手術集中車頭及車尾，大收醒神之效，車頭的包圍換上更硬朗的骨線，將以往霧燈闊口大面的設計稍作移動，猶如兩個櫻桃小嘴的霧燈移放中間位置後，出奇地變成一對小酒窩，令整個擾流更一體化，帶點卡娃兒感覺！
性感車尾
車尾則利用玲瓏曲線帶出性感，換上微微上翹兼趷起的PatPat，加點幻想，確實帶點性感。內櫳沒有太大改動，不過全車座椅換上新絲絨物料，較過往更柔軟貼服，再加上新增的前座雙安全氣袋，即時畀到你十足安全感。
善用空間
Jazz向以小巧、靈活又慳油見稱，雖然日圓滙價上升令車價一代高於一代，不過夠慳油，慳埋慳埋，除笨有精！有時覺得小車才可發揮最大創意空間，尤其是車櫳佈局及設計，以圓為主調的中控設計歸一有序，不過最令人欣賞的是空間運用，對一家一車的家庭，載人載物同樣重要，後排不但可將椅背摺叠，與尾廂營造更闊空間外，後排座椅椅墊一拉收起，騰出一條通道位，擺放單車都無問題。
雖說性能不是小車的首要條件，但Jazz在動力方面絕對合格有餘，配置1.4公升i-VTEC引擎，最高輸出100匹馬力，加上五前速自動波箱，以一般家庭車使用，確實綽綽有餘。
拍心口準時交車
地震、海嘯同核洩漏三料天災衝擊日本，全世界見到都替日本心痛，咁啱呢個時間本田推出JazzFacelift版，香港JazzFans真係多到數唔晒，梗係第一時間問香港代理交車有無影響，代理已經大派定心丸，講明現時仲賣緊現貨，暫時影響不大，不過如果現貨售罄，就可能要等吓，準備榮升Jazz的車主，應該有心理準備喇！
Jazz1.3EX
引擎：1,339cci-VTEC
馬力：100ps/6,000rpm
扭力：13.0kg-m/4,800rpm
傳動：五前速自動波箱
售價：待定
查詢：28278622（合群汽車）