最近講開預算案，有讀者反應，一位讀者Benny來郵指泛民好令長期支持者失望，三月六日晚的行為令他和朋友及家人反感。另一位讀者H來郵話「當樓價跌，無人敢買樓，量跌，價更跌，大嚷樓價高的人不敢買樓，卻害苦了現有屋主！」證諸九八至○三年情況，此說與事實距離不遠，○二、○三年時，樓價低殘，西九「擎天半島」嘅呎價在四至五千元一呎，仲要周圍搵人買㖭。有位朋友K記得當年（好似係○二或○三）董特首無端端被記者問到樓市，佢話：「我買樓，叫兒子買樓，唔怕嘅」（大意如此），結果被人大駡一餐，鬧佢誤導。咦，如果當年聽董先生之言去買樓，現在好妥當啦。大駡董先生之人，家唔知會唔會面紅，或者仍然大嗌上唔到車，政府有責呢？
讀者Bianca就傳來兩封電郵指高官與左丁山不知民間疾苦。「窮人根本無可能儲錢，讀書更加無謂，眼看大學碩士畢業生也找不到工作，要怎樣才能走出困局……」又講到：「我很替香港悲哀，後悔沒有移民。」左丁山就係Bianca在電郵內所言嘅一班曾經窮過嘅本地人，年青時比田北辰窮得太多咯，要讀到中學先至不與父母同床，多租一張冷巷床位上格，瞓覺與苦讀考會考，考中大以至在大學四年，及結婚之前，都係在冷巷碌架床過嘅。現在久唔久行過洗衣街望到間舊樓仍在，就會勾起兒童時代嘅心理陰影。B女士認為當年窮人可以儲錢，可以買樓，今天則不可以，此點左丁山不敢苟同，自己就見過不少九十年代畢業，出身廉租屋邨嘅本地大學生，今天住在中產半豪宅屋苑，甚至係淺水灣、半山區及西九龍。路係自己行出嚟嘅，B女士就埋怨社會冇機會，政府冇政策，窮人注定一世窮，有咁嘅思想，總係希望政府援助，別人幫忙，心理已經輸咗一半，點樣去揮呀。至於話「後悔沒有移民」，唔駛後悔噃，移咗民可能仲慘，仲後悔，左丁山不少好叻嘅朋友校友移民美加，經多年努力，生活一如香港中產，除咗住大屋之外，其他與香港同學毫無分別，但一啲唔夠運嘅，讀完博士之後，今天在美國只能靠微薄社會保障過活，如果佢地肯返嚟香港，老早做咗大教授啦。