記者Ｇ係日本迷，兩年內勤學日語，每逢放假，十次有九次都係去日本，但泰國就一次未去過。現代香港妹，竟然未去過泰國，少見之至。日本發生311大災難，記者Ｇ怏怏不樂，為日本受災人民哀痛之餘，想起復活節後已訂好機票到日本，不知如何是好，堅持行程吖還是改去泰國？左丁山梗係叫佢轉去泰國啦，但記者Ｇ想完又想，還是要等多兩個星期先至決定。
記者Ｇ告知，有香港客在311時剛在東京，擔驚受怕之餘，居然不忘向香港傳媒投訴：「好多公司舖頭都唔做生意嘅，買唔到嘢！」記者Ｇ話：「我係香港人都戥佢醜！」此乃某些香港人之眼淺心態，每以為自己大晒，地鐵班車遲到三分鐘就要上報紙頭版，阿女在倫敦遇上大雪不能如期回港就要政府派包機之類，莫不如此。坐包機返到香港，誰人付鈔？總之唔係佢啦，自有納稅人負責。泰國包機一役特區政府仲有一大筆應收未收帳。
311翌日，Ｑ大姐一早話咗請客，早成個月通知，不便臨時推辭。Ｑ大姐之「私竇」，原來位於觀塘，大廚師就係她的另一半Ｗ先生。兩夫婦好多年前已有協議，界定家庭角色，女主外，男主內，Ｑ大姐僕僕風塵，頻頻出差，走勻全世界，在職場闖出名堂，Ｗ先生則為觀塘某宅之CEO，照顧兩兒之外，因興趣而自學入廚秘技，不拘一格，總之知道有上乘菜式，那管廣東、上海、法國、日本、意大利，就一於深入研究其食譜材料，炮製方法。呢晚Ｗ先生先來一款蒜泥白肉，繼來一味潮式炆蘿蔔，然後是荳芽菜四季豆，嘩嘩，滬潮粵式出齊，主菜就係生炆龍躉腩翅，西檸汁金沙雞，我地睇住佢在廚房內大演功架，成個超級廚師咁款。佢嘅產品，味道如何呀？我地一班平時食慣嘅「刁嘴」讚口不絕，左丁山過往幾個月在灣仔銅鑼灣吃過幾家私房菜，比較之下，Ｗ先生直情有資格到灣仔成名立萬。不過Ｗ先生話：「一旦商業化，壓力太大，要掛住成本與收益，恐怕會失水準！」咁又係嘅，佢兩公婆出錢出力請我地食飯，如要計數都唔知要幾多錢先至得，好彩佢地係講心嘅啫，講金就免問，佢地提供嘅係真正私家私房菜呀！