AerialSports　港跳水舞間

運動是持續修行，但玩得耐，招式難免重複。近年外國運動壇潮興AerialSports，將鋼管、絲帶及呼拉圈等簡單工具，配合多變動作，合成一門新派運動。早前原子等人在銅鑼灣開設學堂，實行小班教學，引領學員「水舞間」上身，對抗地心吸力，激發腦力專注力。

記者：蔡俊業
攝影：陳陶鈞
模特兒：Algie、Kitterick@PureModels

打曲棍球轉跳鋼管舞

■跟做Gym不同，AerialSports在既有套路下，學員可以透過自己的思考去做出不同動作，藉此相信自己，亦從新認識身體。

今年27歲的容承萱（Tessa），是中國及加拿大混血兒，加國出生，其後回香港生活，廣東話識聽唔識講，跟她訪問全程用英文。她自小熱愛運動，「我10歲就開始打Hockey（曲棍球）！」由加拿大打到返香港，加入香港代表隊，曾獲選為香港曲棍球總會最傑出女球手，兩年前更出戰東亞運動會。但手執球棒十多年，總有悶的一天，「打Hockey係一種集體運動，要靠隊員之間嘅合作，就算我自己點樣努力都好，都唔能夠保證一定有好成績；反而做其他運動就可以靠練習，實現目標較為容易！」轉變的種子萌芽了。四年前，Tessa因打曲棍球屢次受傷，某天翻開雜誌，得知上環有當時全港唯一開班教授鋼管舞。一想到要衣着性感，又要穿高踭鞋跳舞，充滿嫵媚，跟打曲棍球的硬朗作風完全相反，「我覺得成件事好cool，好想試！」答案唔講都知，自是一試愛上。日子有功，Tessa感到自己的身體逐漸改變，「Fit咗好多，最初玩嗰陣我伸手掂唔到腳趾，家可以成個人瞓落去大腿上面，同埋做到一字馬；上身強壯過以前好多，成個人嘅平衡力亦都好咗。」越玩越有心機，她去年決定參賽挑戰自己，結果奪得香港鋼管舞錦標賽冠軍，再到日本東京出戰國際賽，得第九名！總算是全港最強，加上曾經參與過專業培訓課程，該可以開班授徒了吧？碰巧幾年前已認識的老闆要開學校向她招手，她便一口答應，成為導師。

■Tessa去年曾以全港第一的身份參加在東京舉行的國際鋼管舞大賽。

■Tessa由10歲開始打Hockey，打到入香港代表隊。（圖片由CarsonChan提供）

■做完Aerial後，學院有專業按摩師幫你做massage。

■索拉奇藝坊之鋼管舞

■索拉奇藝坊之呼拉舞

■索拉奇藝坊之絲帶舞

■水舞間之絲帶舞

■蔡依林去年在台北小巨蛋開騷，都有現場表演呼拉功！

空中運動認識自己

學校中文名「舞上雲霄」，英文AerialArtsAcademy，顧名思義是專門教授AerialSports的地方。此字可直譯為「空中運動」，但講完你都未必get到，最簡單的理解就是所有運動都唔咬地，吊吊fing！訪問當日，Tessa即場向我和model示範三款最常見的AerialSports，包括鋼管舞（PoleDance）、絲帶操（Silk）及呼拉圈操（Hoop）。咦，即時令我諗起蔡依林去年的台北演唱會，懸在半空做出各種性感撩人的動作；而更見得多的，就是《水舞間》和《索拉奇藝坊》的表演片段了。Tessa聽見我的反應，立即笑笑口說：「係o架，其實我哋教嘅真係同佢哋嘅表演幾近似，不過當然無佢哋咁大陣仗啦！」不同的動作及工具，身體需要配合的部位亦不同，像跳鋼管舞時腹部及手臂所需要的力量最多；而玩絲帶操時，力點就集中在上半身及手臂；至於半空玩呼拉圈操，腹部所需要的力量就最多。如此說來，三種當中哪種難度最高？Tessa一邊展示身上的肌肉「戰績」，一邊解釋：「Silk算係三種運動當中最難嘅，因為你要持續咁去用身體喺半空中支撐你成個人，唔似得鋼管舞咁有鋼管可以坐上去；Slik就只能夠利用你嘅肌肉令到你身體搖晃，我可以話玩Pole同玩Hoop係會痛，好似玩Pole咁就會搞到你膝頭下邊同埋腹部會痛，啲皮膚會瘀咗；而玩Hoop要喺一個好細嘅範圍入面郁嚟郁去，要求嘅柔韌度好高，會搞到背脊、膊頭同埋手臂都痛，但相比係Slik就唔算係好難玩。」良藥苦口，付出過的汗水和痛楚總令人有所得着，「因為做呢啲動作時，你會逐少逐少咁畀到信心自己，從而做到放鬆，從中會令到你對身體嘅認知多咗。你會學習到相信你嘅身體、你自己同埋喺旁邊傍住你嘅人，過咗一段時間之後整個人會成長得好快。」

■採訪現場有四位男士，但Tessa本身打開曲棍球，手臂勁有力，要拆鋼管？邊使男人幫！

只有一兩位男學員

這家學院現時主要有四位導師，包括原子鏸，她主力教授類似電影《芝加哥》的百老匯式音樂舞蹈；另外兩位老闆則會偶爾任教工作坊及導師培訓課程，「我哋呢度係全港唯一一間會提供Aerial專業培訓課程嘅學校，就算係高空Aerial，如果配合到嘅話我哋都會教。同埋我哋每隔一段時間就會請啲海外專家嚟香港做交流同埋工作坊！」Tessa說，來參加的學員絕大部份都是職業女性，男性只有一兩位，「可能有啲女仔上堂時候見到男仔會覺得唔係太方便，所以將來我哋都會專門開班淨係畀男仔。」