開心飛起：卧底試團　$19中山團食唔飽　魚翅變素翅

我當初都同你一樣：「$19中山一日團？車費都唔夠喎，係真唔係呀！」因為呢個不可思議的價錢，因為這個疑問，於是，本人同modelCupid立即報名，卧底試團！

記者、攝影：步驚驢
模特兒：CupidPang@HeatzModel

見齊3位贊助商
3.5分　（5分為滿份）

見團費$19就應該知道：此行背後一定有「老闆」，導遊亦樂於開門見山：「今日行程我哋有3位贊助商，希望各位配合一下。」所謂贊助商，就是購物點，上午有賣田七的藥廠，飯後有賣蘆薈護理用品的大觀園。此行最抵讚是就算兩手甩甩步出「贊助商」亦無遇到黑面留難，團友唔落車一樣無問題（當然太多人留車內是會有問題）。最欣賞「贊助商3號」水雲嶺，布依族導賞員「孻妹」操半鹹淡廣東話，推銷之餘還不時自踩產品兩腳，率直得令人聽到哭笑不得。

■4D環幕電影，屏幕青了半邊，效果不濟。

■雖然係素翅，都算魚翅撈飯。

■水雲嶺部份收益回饋雲南山區學童，消費滿300人仔獲證書1張。

■聰明茶最啱女士，有龍眼果香與玫瑰香，消脂養顏，$178（200克）。

■挽袋$83。

■手作布袋$59。

實際費用結算

$19（團費）
$22（保險費）
$36（自費活動1：4D環幕電影）
$59（自費活動2：晚飯）
$50（導遊服務費）
$186（合計）

杜鵑園紀念公園二合一　
4分

論真正景點，全日行程只有一個：孫中山紀念公園。公園位於中山市中心，原名香山公園，事關中山本名香山，後來因孫中山才改名中山。公園地方大，環境優美，大片草地任踩，唔似香港的公園諸多規矩！有旅行社藉辛亥革命100周年之名而來，我們則為入花叢！公園有一杜鵑園，3月中打後漫山開遍杜鵑花，或紫或白或粉紅，離遠已覺壯觀，更修有石板步道在花叢中穿插，最啱龍友打龍啦！

■公園其實唔錯，可惜逗留時間短了一點。

自掏荷包加餸
2分

行程單張大大隻字標榜「魚翅撈飯」，早知無咁大隻蛤乸隨街跳。午餐在雅居樂中心城會所餐廳，飯菜味道都算過得去，餸菜如單張上所列：金瓜蒸排骨、冬瓜燜水鴨、乳香吊燒雞……魚翅撈飯一樣有，不過團友一食就知：「素翅嚟嘅？」我倒沒所謂，反正食翅不道德！晚飯需自費，在中山一家農家菜館，有乳鴿、燒雞、地道蕉蕾湯，味道可以，但份量不夠，仲要自己掏荷包加餸！連肚皮都未能滿足，還要每人收50幾蚊，實在有點那個。

■蕉蕾湯你飲過未？

■燒乳鴿每人分得一件，份量少啲喎！

不見惡阿珍逼購物

行程有兩項自費活動：4D環幕影院及晚餐，兩者同樣在雅居樂中心城會所進行。會所影院細細，30人仔睇一場15分鐘戲，但弊在屏幕壞了半邊，影像唔立體，故事又欠吸引，但座椅動感十足搭夠。至於晚餐，導遊一出發已向各位徵詢意見，說是自願參與，但不參與者都要等別人食完才可返深圳，難免令人覺得「硬食」。不過，單論導遊，此行的小梅完全不是惡阿珍，全程有講有笑，絕無黑面，就算行公園時遲到了都無怨言，值得一讚。