魯賓尼講「黑天鵝」嘅特質，就係黑天鵝不知在甚麼時候，甚麼地點，突然出現；俾人估得到，有所預防，或者市場可以反映得到嘅，就係常見的白天鵝啦。呢次日本311，事先毫無徵兆，突如其來，死得人多，加上福島核電廠爆炸，黑上加黑，任何一位分析師都冇法子預測嘅啫，故此日本股市自去年十一月以來持續上升嘅勢頭，一下子就打殘，自懸崖跳水，連累埋香港股市。左丁山見個市跌咗千幾點，心思思想學人撈底，中貿林電話打到嚟：「喂，人生無常，睇化啲嘞，能夠平安生活，便是幸福，唔好自招麻煩呀！」估唔到佢飛往上海之前，竟會來電警誡，錢銀係身外物，生命才算重要。
跟住肥仔K打電話嚟，話佢嘅同學，在仙台大學做助理教授嗰位，幸好事發時人不在仙台市，連夜趕返東京，因電訊不通，無法子與朋友聯絡，隔咗三日先至可以報平安。點知在東京老家驚魂甫定之際，政府發警報話「福島」核電輻射即將吹到東京，唉，走去邊吖，唯有望天打卦，出門擔遮、着雨衣，叫做有啲防備，但輻射呢樣嘢，一旦洩漏於大氣之中，無處不在，生命只能付諸天意。
諗番香港，假若大亞灣核電遇上如此意外，我地可以走得去邊？答案係無地可逃，知道嘅時候已經太遲，只好求神拜佛香港鄰近地區唔好發生九級大地震及大海嘯。科學家一直話同樣意外發生嘅機率好低，注意係機率啫，萬分之一嘅機率甚至千分之一嘅機率都係好低，但要發生起嚟，都係會發生，反正自己無法子理解，只好信專家之言，求心之所安。美國方面嘅專家就話假若同樣地震海嘯在加州發生，甚至西雅圖亦會被海水浸蓋，加州嘅核電廠同樣位於地震帶，命運可能與福島相同，現在就要諗方法防止同樣事件重演。
財經分析師又來電，叫左丁山揸緊現金，不可亂動，入市不宜，北非、中東、日本亂作一團，美國無力再做世界警察維持秩序，世界陷入羣龍無首之局，各國自掃門前雪，最緊要睇定啲喎。