上個月預告縮減舊年高層花紅嘅東亞銀行（023），果然言出必行！噚日出爐嘅東亞年報顯示，主席李國寶（圖）舊年人工3020萬，大減咗47.75%，返番去06、07年水平，減咁多主要係因為花紅少咗千幾萬，well，都算係兌現承諾。
花紅少咗千幾萬
咁其他董事有無減埋一份呢？嗯，除咗過咗身嘅蒙民偉減咗之外，有4個獨立非執行董事係有薪加嘅，分別係四叔李兆基、新地（016）郭炳江、偉易達（303）黃子欣同維他奶（345）羅友禮，每人每年各加10萬大元……唔知會唔會俾小股東嘈呢？
有口痕友話，寶哥哥肯減花紅，應該係因為金融海嘯之後，監管機構開始睇實銀行高層花紅，所以「自律」云云。華華記得，09年寶哥哥人工大加七成之後，俾小股東鬧爆，如果再唔從善如流，俾人鬧多次就唔好喇！