曼聯領隊費格遜恃住自己喺英超嘅超然江湖地位，郁啲就狂插球證，有時仲連英足總都鬧埋。不過，老費因早前批評球證艾堅遜，結果英足總忍唔住出虎頭鍘鍘佢，重罰佢停賽5場，搞到佢唔可以喺溫布萊對曼城場英足盃4強督師，仲俾車路士領隊安察洛堤出嚟抽佢水。今次佢老人家真係玩大咗，睇嚟係時候收吓火。
下周二生效鬥曼城避席
俾費Sir插過嘅球證先生多到十隻手指數唔晒，較出名嘅有雲達、卡頓保同埋甸恩。至於今次事件主角艾堅遜，早喺08年5月都俾費Sir鬧過，費Sir亦因此而俾英足總告行為不檢，不過最後罪名不成立而冇事。但費Sir今次冇咁好彩，佢喺本月1號紅魔輸畀車仔1:2場英超嘅賽後，狂插艾堅遜冇理由唔趕連番侵犯查維亞靴南迪斯同朗尼嘅大衛雷斯出場，仲形容對方係佢見過最差嘅球證；之後被控行為不檢，而且寸到唔認罪，於是英足總決定用虎頭鍘侍候佢，重判佢停賽5場同罰3萬鎊（約375,000港元），並由本月22號開始生效。
六十有九嘅費Sir可於下個禮拜一前提出上訴，唔上訴的話，就可要求停賽令提早於本周六（主場對保頓）生效。雖然，下月中喺溫布萊場英足盃4強戰對曼城佢帶唔到，但就趕得切喺5月1號對阿仙奴場大波復出領軍。如果上訴又失敗，咁即係對阿仙奴場波一定唔使預佢，所以，佢正為此煩緊。老費話：「我真係好失望，你居然唔可以講真話。而我仲未決定上唔上訴。」
里奧收「咧」 奧沙唞5周
咁都未算，曼聯後防仲有一大班傷兵，例如尼曼查維迪（唞兩星期）、奧沙（唞5周）、拉菲爾達施華（唞兩至3周）同埋里奧費迪南（唞到季尾），令老費話周六對保頓場英超，得番法比奧達施華、基斯史摩寧、布朗同艾拉4個後衞。
費Sir今次玩大咗而俾英足總重罰，車仔領隊安察洛堤即刻出嚟抽水。肥安話：「停5場實在太多啦！」唔係我求大俠想諗衰肥安，但車仔同曼聯喺英超係競爭對手，曼聯嚟緊幾場冇咗費格遜喺場邊督師，車仔、阿仙奴同曼城仲唔掩住半邊嘴偷笑咩！