唔係四四方方周身泥先叫越野，家陣代步用嘅SUV，OffRoad科技勁到嚇你一跳！德國福士之城嘅駕駛體驗訓練場，新加入兩大極惡Items，凹凹凸凸又斜又爛，為嘅係試盡四個轆似四隻腳咁靈活嘅Touareg，就算對住40°大落斜，唔踩Brake一樣識拖慢落山！
記者、攝影：徐影龍
鳴謝：VolkswagenHK
尖石墩 似走梅花樁
位於德國Wolfsburg嘅Autostadt，包含新車部、旗下品牌概念展館、汽車博物館、商場及五星酒店，自成一國儼如福士之城。早年已到訪過Autostadt，今番重臨，全因其駕駛體驗訓練場新加入兩大「極惡」爛路考驗，加上本身已充滿各式各樣爛路環節，整段15分鐘Off-Road路程，好似玩完一轉遊樂場咁剌激。
老實講，與其話駕駛訓練，倒不如叫Touareg表演Show好過，事關全程毋須動用特別駕駛技巧，揸實軚盤、按情形扭動Touareg唔同嘅Off-Road模式就搞掂。福士嫌之前唔夠激，新加入梅花間竹嘅尖形石墩，每個石墩近3呎高，睇住Touareg獨立懸掛超強升降功能，行一步、伸一伸，成架車不斷近30°左右搖晃，真係好似過梅花樁咁高難度，已經超出SUV嘅一般使用，直逼大腳八爬山車嘅境界。忽爾，我諗起洪金寶同葉問喺飯枱大戰一幕，點玩都唔跌，而架Touareg又實在好有大哥大嗰種壓場氣勢。
新考驗
落坡緩衝 毋須踩Brake
繼續前進，途中經過不同嘅Off-Road情況，包括濕泥、大碎石、傾側路面同搖搖橋等，經過剛才一役，呢啲已算小菜一碟，嚟到另一新加壓軸Item，就係上落40°大斜山坡，當然訓練場唔會畀Touareg咁易Pass，路上又再鋪設凸起石塊同凹陷大洞，唔好忘記係上大斜，小小凹凸足以造成意外。可幸Touareg獨門CDC連續可變式氣壓懸掛，以及DRP動態換檔系統，將輸出加大，就算爬上惡劣大斜坡，都唔會出現踩大油Spin胎嘅危險情形。由於角度太斜，坐喺車內根本睇唔到路面，啟動360°環迴鏡頭，的確令我安心好多。
上到頂以為鬆一口氣，點知指導員又再扭一扭Off-Road模式，啟動斜坡緩衝功能，落坡時叫我NoBrake！唔係啩？成40°大落斜，望住下方有點跳樓Feel，我控制唔到隻腳，不期然下意識「印」住Brake落。指導員有點不耐煩，「NoBrake！」死就死啦，反正架車唔係我嘅。呢個時候奇妙嘅事發生了，咁大架Touareg，落斜時居然穩重地徐徐而下，嗰種重回人間嘅感覺，真係好奇妙。咪以為我當玩，今日試盡咁多Off-Road環境，的確唔係咁易碰到，但總少不免遇上預計唔到嘅濕滑坡道、凹凸爛路，呢個時候，Touareg真係可以為你撿回一命。
新考驗
駕駛體驗費用：25歐元（約港幣270元）
Autostadt官網： http://www.autostadt.de/en.html